Եկեղեցական Օրացույց

Ս. կույսեր Թեկղի, Վառվառայի և Պեղիգեայի հիշատակության օր

2019 -10-08

Ս. Թեկղը ¥Ա դար¤ ծնունդով Իկոնիայից է և շատերին քրիստոնեական հավատի բերելու համար կոչվել է «առաքելահավասար»: Նա 18 տարեկան հասակում, լսելով Ս. Պողոս առաքյալի քարոզությունը, դարձի է գալիս և որոշում չամուսնանալ` իր ողջ կյանքը նվիրաբերելով Քրիստոսի խոսքի քարոզությանը: Թեկղի մայրը, զայրացած իր աղջկա որոշման վրա, գանահարում է նրան և ապա ցանկանում այրել նրան: Սակայն տեղացած հորդառատ անձրևը թույլ չի տալիս, որ կրակը ավելի բորբոքվի: Նա մեկնում է Պիսիդյան Անտիոք, որտեղ կրկին հարազատների պահանջով, նետվում է վայրի գազանների առաջ, որոնք սակայն ձեռք չեն տալիս նրան: Ի վերջո նա առանձնանում է Կիլիկիայի Սելևկիա քաղաքի մերձակայքի մի մենաստանում, ուր նվիրվում է Ավետարանի քարոզչությանը, հիվանդներ բժշկելուն և խնամելուն: Մահանում է խաղաղ մահվամբ, 90 տարեկանում:

Ս. Վարվառան (†շուրջ 306) նահատակվել է Մաքսիմիանոս կայսեր օրոք, Փյունիկյան Իլիոպոլիս քաղաքում: Նա լսում է իր հայրենի քաղաքի քրիստոնյաների քարոզությունը և մկրտվում նրանցից: Վառվառան կարգադրում է իրենց նորոգվող տան պատուհաններից մեկը խաչաձև սարքել, որի համար Վառվառայի հեթանոս հայրը չարչարանքների է մատնում նրան: Ս. կույսը երկար տնային բանտարկությունից հետո էլ չի ուրանում իր հավատքը և դատարանի որոշմամբ գլխատվում է իր իսկ հոր կողմից: Քիչ ժամանակ անց դաժան դատավորն ու կույսի հայրը այրվում են կայծակից:

Ս. Պեղիգեա Տարսոնացին (†290) մեծահարուստ և ազնվական ընտանիքի զավակ է, Դիոկղետիանոս կայսեր ժամանակակիցը: Մկրտվում է և իր թանկարժեք զգեստները վաճառելով՝ բաժանում աղքատներին և կարիքավորներին: Նա մերժում է դառնալ Դիոկղետիանոս կայսեր որդեգրի կինը: Պեղիգեան իբրև քրիստոնյա հանձնվում է կայսերական դատարանին, չարչարվում, և հավատը չուրանալու համար, հրաշեկ հնոցում այրվում է:

 

Հայ Առաքելական եկեղեցին Ս. կույսեր Թեկղի, Վառվառայի և Պեղիգեայի հիշատակը տոնում է Ս. Խաչի Դ կիրակիին հաջորդող երեքշաբթի օրը: