Նվիրապետական Աթոռներ

Ամենայն Հայոց Կաթողիկոսն ընդունեց Մասիսի շրջանի ուխտավորներին

 

Նոյեմբերի 3-ին Մայր Աթոռ Սուրբ Էջմիածնում Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսն ընդունեց Մասիսի շրջանի Դաշտավան, Զորակ և Նիզամի գյուղերի շուրջ հարյուր դպրոցականների և ուսուցիչների, որոնք հայոց հոգևոր կենտրոն էին ժամանել իրենց որդիական խոնարհումը բերելու և շնորհավորելու Ամենայն Հայոց Հայրապետին օծման ու գահակալության 20-րդ տարեդարձի առիթով: Հանդիպմանը ներկա էր Արարատյան Հայրապետական թեմի առաջնորդական փոխանորդ Գերաշնորհ Տեր Նավասարդ արքեպիսկոպոս Կճոյանը:

Ուխտավորներին ուղեկցում էր Մասիսի շրջանի Դաշտավան համայնքի  հոգևոր հովիվ Արժանապատիվ Տ. Աբրահամ քահանա Մարտիրոսյանը:

Տեր Հայրը ներկաների անունից շնորհավորեց Նորին Սրբությանը գահակալման քսանամյակի կապակցությամբ՝ մաղթելով արևշատ օրեր և բազմաբեղուն հովվապետություն:

Այնուհետև Ամենայն Հայոց Կաթողիկոսն իր օրհնությունը բաշխեց ուխտավորներին՝ գոհունակություն հայտնելով Մայր Աթոռ այցելելու առիթով: Նորին Սրբությունը հիշեցրեց, որ 2019թ. հռչակվել է Ընտանիքի տարի և այս առնչությամբ հորդորեց ուխտավորներին սրբությամբ պահել ազգային ավանդույթներն ու ընտանեկան արժեքները:

Նորին Սրբությունն իր բարեմաղթանքները փոխանցեց ուխտավոր հայորդիներին՝ հայցելով, որ Աստծո Սուրբ Աջը մշտապես հովանի լինի և իր առատ շնորհները հեղի նրանց վրա, որպեսզի ապրեն խաղաղ և շենացնեն հայրենի մեր երկիրը:

Place for supporters
& advertisement