Նվիրապետական Աթոռներ

Մ Ա Հ Ա Զ Դ

Ն.Ս.Օ.Տ.Տ. Արամ Ա. Մեծի Տանն Կիլիկիոյ Կաթողիկոս եւ Մեծի Տանն Կիլիկիոյ Միաբանութիւնը սրտի դառն կսկիծով կը գուժեն Կիլիկեան միաբանութեան երէց անդամներէն

Տ. ՆՈՐԱՅՐ ԵՊՍ. ԱՇԸԳԵԱՆԻ
(1956-2017)
վախճանումը, որ պատահեցաւ Ուրբաթ 21 Յուլիսի առաւօտուն։

Վերջին օծման ու թաղման կարգը պիտի կատարուի Երկուշաբթի 24 Յուլիսին, առաւօտեան ժամը 10-ին, Անթիլիասի Սուրբ Գրիգոր Լուսաւորիչ Մայր տաճարին մէջ, յընթացս Սուրբ եւ Անմահ Պատարագին, նախագահութեամբ Վեհափառ Հայրապետին։ Ապա, Սրբազան Հօր մարմինը պիտի ամփոփուի մայրավանքի միաբանական դամբարանին մէջ։

ԴԻՒԱՆ ԿԱԹՈՂԻԿՈՍՈՒԹԵԱՆ ՀԱՅՈՑ
ՄԵԾԻ ՏԱՆՆ ԿԻԼԻԿՈՅ

ԳԵՐՇ. Տ. ՆՈՐԱՅՐ ԵՊՍ. ԱՇԸԳԵԱՆ

Աւազանի անունով Մովսէս, ծնած է 1956 թուականին, Քէսապ (Սուրիա): Նախնական ուսումը ստացած է Քէսապի Ուսումնասիրաց Միացեալ Վարժարանին մէջ: 1971-ին ընդունուած է Մեծի Տանն Կիլիկիոյ Կաթողիկոսութեան Դպրեվանքը, որուն Ժառանգաւորաց բաժինը աւարտելով 1973-ին՝ սարկաւագ ձեռնադրուած է:
1976-ին աւարտելով Դպրեվանքը՝ ձեռնադրուած է կուսակրօն քահանայ, վերակոչուելով Նորայր Աբեղայ: Մինչեւ 1979, վանական պաշտօններու առընթեր, Դպրեվանքէն ներս դասաւանդած է հայագիտական նիւթեր:
1979-1991 ան վարած է Ճէզիրէի շրջանին (Սուրիա) Առաջնորդական Փոխանորդի պաշտօնը, Գամիշլիի մէջ: 1986-ին ստացած է Ծայրագոյն Վարդապետութեան կարգը:
1992-1993 ան նշանակուած է Բերիոյ Թեմի Առաջնորդական Փոխանորդ:
1994-1997 որպէս հոգեւոր հովիւ ծառայած է Քոքինիոյ Ս. Յակոբ Եկեղեցւոյ մէջ:
1997-2001 դարձեալ ստանձնած է Ճէզիրէի Առաջնորդական Փոխանորդի պաշտօնը:
2008-ին Նորայր Ծ. Վրդ. Եպիսկոպոս ձեռնադրուած է։
2002-էն մինչեւ իր վախճանումը Սրբազանը վարած է Մեծի Տանն Կիլիկիոյ Կաթողիկոսութեան տպարանի տեսուչի պաշտօնը։

Place for supporters
& advertisement