Նվիրապետական Աթոռներ

Պատրիարքական Տեղապահը ընդունեց կիսասարկաւագներն ու ուրարակիր դպիրները

Պատրիարքական Տեղապահ Բարձր. Տ. Գարեգին Արքեպս. Պէքճեան, 24 Օգոստոս 2017, Հինգշաբթի, ժամը 19.00-ին, Աթոռանիստ Մայր Եկեղեցւոյ Յարութիւն Ամիրա Պէզճեան Սրահին մէջ ընդունեց կիսասարկաւագներն ու ուրարակիր դպիրները։

Հանդիպման ներկայ էին Պատկառելի Կրօնական Ժողովոյ Ատենապետ՝ Գերշ. Տ. Սահակ Եպս. Մաշալեան եւ ժողովական հայրերէն՝ Հոգշ. Տ. Եղիշէ Վրդ. Ուչքունեան, Գերպ. Տ. Զաքէոս Ծ. Վրդ. Օհանեան, Արժ. Տ. Գրիգոր Աւ. Քհնյ. Տամատեան եւ Արժ. Տրդատ Քհնյ. Ուզունեան։

Տեղապահ Սրբազան Հայրը արտասանեց Տէրունական Աղօթքը, որմէ յետոյ Նորին Սրբազնութիւնը հայրական օրհնութեամբ ողջունեց ներկաները։ Շնորհակալութիւն յայտնեց իրենց ներկայութեան համար եւ գնահատեց իրենց ծառայութիւնը։ Ըրաւ հայրական թելադրութիւններ, յատկապէս անոնց յիշեցնելով, թէ միայն ծիսական արարողակարգային դրութեան ծանօթութիւնը բաւարար չէր, այլ անոնց առընթեր եկեղեցւոյ սպասաւորները իրենց աստիճանին պարտադրած չափով պէտք է նաեւ զարգացնեն իրենց գիտելիքները հոգեւոր առումով եւս բարձրանալու առաջադրութեամբ։ Եկեղեցւոյ սրբութիւններն են Սուրբ Գրական գիտելիքները, մեր հայրերու թողած հոգեւոր ժառանգը, եկեղեցւոյ սրբազան պատմութիւնը, որոնցմով զարգանալը հոգեւոր եւ բարոյական առումով շատ բան կը շահեցնէ եկեղեցւոյ ծառայողին։ Ընդգծեց, թէ գիտելիքներով օժտուած անհատներ, նաեւ օգտակար կրնան ըլլալ այլոց, որոնք հարցումով կը դիմեն իրենց։

Տեղապահ Սրբազան Հայրը, յիշեցուց թէ անհատները հետաքրքրող հարցերը նաեւ հարցերն են ընկերութեան։ Ուստի այս հարցերը օրակարգի բերելու եւ անոնց լուծումներ որոնելու ճանապարհը կ՚անցնէր միասնական խորհրդակցութեամբ եւ անոնց հետեւող համերաշխ աշխատանքներով։ Այս առումով առաջարկեց որ ներկաներ ազատ զգան արտայայտուելու իրենց հետ առընչուած զանազան հարցերու մասին։ Նաեւ առաջարկներ բերեն, իրենց դասը զարգացնելու առընչութեամբ։ Եղան խօսք առնողներ, որոնք շեշտեցին երաժշտական եւ այլ գիտելիքներու մասին դասաւանդութեան կարեւորութիւնը, յատկապէս այն եկեղեցիներու ծառայողներուն համար որոնք կարելիութիւնը չունին իրենց անմիջական շրջանակին մէջ նման աշխատնքներ տանելու։ Տեղապահ Սրբազան Հայրը, որ միշտ շեշտած էր լսարանի դրութեան կարեւորութիւնը սիրով ընդառաջեց ներկայացուած խնդրանքին։

Սահակ Սրբազան, Եղիշէ եւ Զաքէոս Հայր Սուրբերը իրենց կարգին արտայայտուելով ընդգծեցին միասնական աշխատանքին կարեւորութիւնը եւ յատկապէս յիշեցուցին թէ այս աշխատանքները կը պտղաբերէին յարատեւութեամբ։

Սրբազան Հայրը Պահպանիչ աղօթքով օրհնեց ներկաները եւ բոլորին յաջողութիւն մաղթեց իրենց ծառայութեանց մէջ։ Միասնաբար երգուած Տէրունական Աղօթքով ընդունելութիւնը հասաւ իր աւարտին։

Դիտել սկզբնաղբյուրը
Place for supporters
& advertisement