Նվիրապետական Աթոռներ

Ս. Ղեւոնդեանց տօնակատարութիւնը Կոստանդնուպոլսի Հայոց Պատրիարքութիւնում

Սրբոց Ղեւոնդեանց Քահանայից տօնին առթիւ Ս. Աստուածածին Աթոռանիստ Մայր Տաճարի մէջ 21 Փետրուար 2017, Երեքշաբթի առաւօտ կատարուեցաւ մեծահանդէս արարողութիւն, հանդիսապետութեամբ Պատրիարքական Ընդհանուր Փոխանորդ Բարձր. Տ. Արամ Արքեպս. Աթէշեանի, իր շուրջն ունենալով Պատրիարքական Աթոռի հոգեւորականաց դասը։

Ս. Պատարագը մատոյց՝ Արժ. Տ. Եղիա Քհնյ. Քէրվանճեան։ Ս. Պատարագի երգեցողութիւնները կատարեցին Քահանայից Դասու անդամները, առաջնորդութեամբ՝ Արժ. Տ. Գրիգոր Աւ. Քհնյ. Տամատեանի։

Նախքան Տէրունական Աղօթքը, Գերպ. Տ. Զաքէոս Ծ. Վրդ. Օհանեան կարդաց Ս. Ղեւոնդ Քահանայի ճառը Աւարայրի Դաշտին վրայ։ Յետ ընթերցման, քարոզեց, բնաբան ունենալով Յովսէփ Կաթողիկոսի նախ քան իր նահատակութիւնը արտասանած վերջին խօսքերը։ Հայր Սուրբը, ընդարձակօրէն պատմեց Սրբոց Ղեւոնդեանց Քահանաներու գլխարկման ներքեւ յիշատակուած սուրբերու վարքը, ընդգծեց, թէ անոնց մէջ կը գտնուէր օրուան կաթողիկոսը Յովսէփ Հողոցմեցի, իր կողքին ունենալով եպիսկոպոսներ, քահանաներ եւ սարկաւագներ։ Շեշտեց անոնց կարեւոր դերը, Աւարայրի Ճակատամարտին մէջ, զօրացնելով բանակի զօրականները։ Ղեւոնդեանց եւ Վարդանանց շարժումը ներկայացուց, որպէս ողնասիւնը Հայաստանեայց Եկեղեցւոյ գոյութեան։ Անդրադարձաւ նաեւ, թէ իր Հայաստանեայց Եկեղեցւոյ առաքելութիւնը, ողն ու ծուծն էր Հայ ժողովուրդի որպէս Քրիստոնեայ ժողովուրդ գոյատեւման։ Իր խօսքերու աւարտին, քարոզիչ Հայր Սուրբը, յանձին Արամ Արքեպիսկոպոսի, Պատրիարքական Աթոռոյ հոգեւորականաց դասուն Ս. Ղեւոնդեանց Քահանայից Տօնը շնորհաւորեց։ Սրտագին մաղթանքներով յիշեց Ն Ս. Տ. Մեսրոպ Սրբազան Պատրիարք Հայրը։

Յաւարտ Ս. Պատարագի կատարուեցաւ պաշտօն եկեղեցւոյ հանգուցեալ բոլոր սպասաւորներու հոգւոցն ի հանգիստ։
Հոգեհանգստեան Պաշտօնի աւարտին Բարձր. Տ. Արամ Ս. Արքեպիսկոպոս «Աւագ»ութեան պատիւ եւ ծաղկեայ փիլոն կրելու արտօնութիւն շնորհեց պատարագիչ Արժ. Տ. Եղիե Քահանայ Հօր, որ կը պատրաստուէր մեկնիլ Գանատա, իր հոգեւոր ծառայութիւնը շարունակելու համար Գանատահայոց Թեմէն ներս։
Եկեղեցական արարողութեանց աւարտին, Տաճարի յարակից Յարութիւն Ամիրա Պէզճեան սրահին մէջ հոգեւորականներու ի պատիւ սարքուեցաւ սիրոյ սեղան։

Սիրոյ սեղանին, արտայայտուեցաւ Արժ. Տ. Եղիա Աւագ Քահանան եւ շնորհակալութիւն յայտնեց Արամ Սրբազան Հօր, եւ իր անձին մէջ բոլոր հոգեւոր եղբայրներուն։

Հուսկ բանքը արտասանեց Արամ Սրբազան Հայրը եւ անդրադարձաւ հոգեւոր եղբայրներու միջեւ սիրոյ եւ եղբայրական զգացման կարեւորութեան, որ գլխաւոր ազդակն էր եկեղեցւոյ առողջ հիմերու վրայ գոյատեւման։ Տէրունական Աղօթքի արտասանմամբ վերջ գտաւ Սիրոյ Սեղանը։

Place for supporters
& advertisement