Նվիրապետական Աթոռներ

Թաղում Տ. Համբարձում Վրդ. Քէշիշեանի

Ս. Յակոբեանց Միաբանութիւնը վիշտն ունեցաւ կորսնցնելու իր ծառայասէր Միաբաններէն Ս. Աթոռոյս Աւագ Թարգման՝ Հոգեշնորհ Տ. Համբարձում Վրդ. Քէշիշեանը:

Հանգուցեալը՝ աւազանի անունով Հրաչ, ծնած էր Պէյրութ՝ 1958-ին:
1972-1978 տարիներուն ուսանած էր Պատրիարքութեանս Ժառանգաւորաց Վարժարանի եւ Ընծայարանի մէջ:
1978-ին ձեռամբ՝ Գերշ. Տ. Շահէ Արք. Աճէմեանի ձեռնադրուած էր Սարկաւագ:
1979-ի Յունուարին ձեռամբ՝ այդ օրերու Ռոմանիոյ եւ Պուլկարիոյ թեմերու Առաջնորդ՝ Գերշ. Տ. Տիրայր Արք. Մարտիկեանի ձեռնարդուած էր կուսակրօն աբեղայ:
1984-ին ստացած էր մասնաւոր վարդապետութեան աստիճան:
Իր բազմամեայ ծառայութեան ընթացքին լուսահոգի Հայր Սուրբը եղած էր գաւազանկիր, Ս. Աթոռոյս մատակարար, Ս. Աթոռոյս Աւագ Թարգման: Քանիցս ընտրուած էր Տնօրէն Ժողովի անդամ:

Հանգուցեալին մարմինը Մայր Տաճար փոխադրուեցաւ 12 Մարտ, 2019-ին, երեկոյեան ժամերգութեան աւարտին, շարականներու երգեցողութեամբ դագաղը զետեղուեցաւ Ս. Յակոբեանց Մայր Տաճարի ատեանին մէջ:

Յաջորդ օրը՝ 13 Մարտ, 2019-ին, Մայր Տաճարի Աւագ Սեղանին վրայ հանգստեան Ս. Պատարագ մատոյց Հոգշ. Տ. Գէորգ Աբղ. Հայրապետեան: «Ողջոյն»-էն առաջ դագաղը բեմ հանուեցաւ, ուր Սուրբ Աթոռոյս Գահակալ՝ Ամենապատիւ Տ. Նուրհան Արք. Մանուկեան Պատրիարք Սրբազան Հայրը կատարեց Վերջին Օծումը եւ խօսեցաւ դամբանականը, դրուատելով քառասուն տարիներու եկեղեցասէր գործունէութիւնը հանգուցեալին, որմէ ետք նախ Միաբանութիւնը եւ ապա ժողովուրդը մօտեցաւ աջը առնելու հանգուցեալին:

Ժամը 10:30-ին Մայր Տաճարին մէջ կատարուած հանգստեան կարգէն ետք կազմուեցաւ թաղմանական թափօրը, մասնակցութեամբ ամբողջ Միաբանութեան, հոգեւոր երգերով եւ հանգստեան Աւետարաններու ընթերցմամբ առաջնորդելու հանգուցեալը իր յաւիտենական կայքին: Յուղարկաւորութեան արարողութեան նախագահեց Լուսարարապետ՝ Գերշ. Տ. Սեւան Արք. Ղարիպեան: Հայր Համբարձումի մարմինը ամփոփուեցաւ Ս. Փրկչի Միաբանական գերեզմանատան մէջ:

Իր մահով՝ Պատրիարքութիւնը կը կորսնցնէ իր պարտականութեանց գիտակից ու նուիրեալ եկեղեցականը, որ գիտցաւ գոյիւ չափ բերել իր օգուտն ու մասնակցութիւնը մեր միաբանական կեանքին:

Բոլորով սրտիւ կ’աղօթենք հանգուցեալ Հայր Սուրբի հոգիին համար, թող Երկնաւոր Հայրը, իր երկնային լոյսերուն մէջ հանգչեցնէ անոր բարի հոգին եւ իր երկնային մխիթարութիւնը պարգեւէ Միաբանութեանս անդամներուն եւ անոր անմիջական հարազատներուն եւ ընտանեկան պարագաներուն:

Place for supporters
& advertisement