Թեմեր և Պատվիրակություններ

Արեւմտեան թեմի Հոգեւորականաց Ընդհանուր ժողովը

Մայիսի 5-ին Արեւմտեան թեմի Առաջնորդանիստ Արմէն Համբար սրահում տեղի ունեցաւ թեմի Հոգեւորականաց Ընդհանուր ժողովը, նախագահութեամբ Առաջնորդ Յովնան Արք. Տէրտէրեանի եւ մասնակցութեամբ երեք տասնեակ հոգեւոր հայրերի։ Ժողովէն կը բացակայէին հանգստեան կոչուած եկեղեցականներ։ Ժողովի ատենապետն էր Հոգշ. Սասուն Ծ. Վրդ. Զմրուխտեանը, քարտուղարը՝ Արժ. Մաշտոց Քհնյ. Քէշիշեանը։ Սա առաջին ժողովն էր նախորդ տարուայ արգելանքներից յետոյ, եւ դրանով պայմանաւորուած էր ժողովի խիստ յագեցած օրակարգը ու նաեւ քննարկումների արդիւնաւէտ ընթացքը։

Ժողովը բացուեց հոգեւոր արարողութեամբ, որից յետոյ, մինչ Առաջնորդ Սրբազանի զեկոյցը, Մաշտոց Չոպանեանը ներկայացրեց օրուայ Աւետարանական ընթերցուածքի խորհուրդը՝ խօսելով Թզենու առակի մասին, եւ վերջում յղեց. «Թող այս հաւաքը իմաստնութեամբ ընթանայ՝ լեցուն պտուղներով»։ Խօսք առաւ Ատենապետ Հայր Սասունը, եւ խօսեց յատկապես 2020 թ. բերած պատուհասների, այդ թուում՝ մեր եկեղեցու կորուստների մասին։ «44 օրերին պատերազմող մեր ժողովուրդին աջակցելու թեմի քայլերը ցոյց տուեցին, որ Արեւմտեան թեմը Յովնան Սրբազանի առաջնորդութեամբ իսկապէս հայրենիքի հետ կապուած եւ նրա ցաւով ապրող հաստատութիւն է», ընդգծեց Հայր Սասունը։

Յաջորդիւ իր Զեկոյցը ներկայացրեց Առաջնորդ Սրբազանը՝ յատկապէս կանգ առնելով հայրենիքի աջակցութեան ծրագրերի վրայ։ Համավարակի, Արցախեան ազատամարտի եւ այլ ծրագրերի համար միայն թեմի եւ ծուխերի, առանձին հոգեւորականների ջանքերով հանգանակուել է բազմամիլիոն աջակցութիւն, որոնք այսօր էլ շարունակւում են, «եւ դա պատիւ է բերում մեր թեմին ու հոգեւորականաց, որոնց քարոզչական կոչերով հնարաւոր եղաւ հասնել նման արդիւնքի», ասաց Յովնան Սրբազանը եւ յոյս յայտնեց, որ անհանդուրժողութեան ոգին կը վերանայ եւ Հայաստանը շուտով կ’անցնի ստեղծագործ աշխատանքի, քանզի «արտաշխարհը իր հայացքը յառած է հայրենիքին»։ Առաջնորդ Սրբազանը նաեւ իր գնահատանքի խօսքն ասաց Առաջնորդարանի պաշտօնէութեանը՝ Յարութ Սրկ. Մարգարեանի գլխաւորութեամբ։

Ժողովի ժամանակ արծարծուեցին բազմաբնոյթ հարցեր, որ վերաբերում են հիմնական մի քանի թեմաների։

Առաջնորդարանի բաժիններ։ Ժողովի ընթացքին Առաջնորդարանի աշխատանքներըը ներկայացրեց Առաջնորդարանի տնօրէն Յարութ Սրկ. Մարգարեանը։ Նա մանրամասնեց ապահովագրութեան հարցերը՝ դրանց մանրակրկիտ իրականացման վրայ հրաւիրելով ներկաների ուշադրութիւնը, առաջարկեց առաւել սերտացնել ծուխերի ու Առաջնորդարանի միջեւ կապը։ Մեդիա բաժնի պատասխանատուներ Վահէ Սարգսեանը եւ Սերգեյ Առուստամեանը խօսեցին լրատու նիւթերի եւ դրանցում ծուխերի ծրագրերը հնարաւորինս լայնօրէն արտացոլելու հարցերի մասին։ Մասնակիցները ցանկութիւն յայտնեցին Առաջնորդարանի բոլոր ծրագրերը առաւել հասանելի դարձնել ծուխերում։

Հոգեւոր-կրթական ծրագրեր։ Արեւմտեան թեմի հոգեւոր-կրթական լայն առաքելութեանը ժողովին անդրադարձ եղաւ տարբեր առումներով։ Մաշտոց Չոպանեանը ներկայացրեց Աստուածաշնչական սերտողութեան ծրագրերը՝ պատրաստակամութիւն յայտնելով ծուխերին տրամադրել խտացուած դասընթացների նիւթեր։ Հայկ Մադոյեանը խօսեց Քրիստոնէական դաստիարակութեան ծրագրերի մասին, որոնք ներառում են մասնաւորապէս դասընթացներ, ուխտագնացութիւններ, առանձնացումներ, ներկայում նաեւ՝ դասեր Սեւանի դպրեվանքի սաների համար։ Ընդմիջումից յետոյ ծաւալուած քննարկումների ընթացքում Տ. Վազգէն Քհնյ. Բոյաջեանը ներկայացրեց Շաբաթնօրեայ եւ Կիրակնօրեայ դպրոցների առաքելութեան բարելաւման հարցերը, որի վերաբերեալ անհրաժեշտ համարեց կազմակերպել կիրակնօրեայ ուսուցիչների վարժանքներ նոր ծրագրին համապատասխան, նախապատրաստել հայ եկեղեցու քրիստոնէական նոր հրատարակութիւն՝ հաշուի առնելով տարիքային առանձնայատկութիւնները։ Քննարկուեց ամռանը մէկշաբաթեայ կրթական ծրագիր կազմակերպելու հարցը Նիւ Եորքի Ս. Ներսէս ճեմարանի օրինակով, յաճախացնել հաւատացեալների ընկերային միջոցառումները՝ համեմուած հոգեւոր բովանդակութեամբ, սարկաւագաց հաւաքներին պարբերաբար հրաւիրել հոգեւոր հայրերին։

Տ. Վազգէն Քհնյ. Մովսիսեանը խօսեց Ապրիլի 23-24-ի արարողութիւնների եւ տեղ գտած որոշ անհարթութիւնները յետագայում ուղղելու հարցերի մասին, ներկայացրեց նաեւ թեմի երիտասարդական ծրագրերը, այդ թւում՝ Սերունդների կամրջում (Bridging Generation) եւ Սարկաւագաց խորհուրդ (առ ի տեղեկութիւն՝ Արեւմտեան թեմում ծառայում են գրեթէ 330 սարկաւագներ)։ Տէր Շնորհքը մատուցեց քարոզխօսական որոշ գործնական նկատառումներ՝ հաւատացեալների հնարաւոր հարցականներին պատասխանել կարողանալու համար։

Մարդասիրական ծրագրեր։ Ինչպէս վերը արդէն նշել ենք՝ յղում անելով Յովնան Արք. խօսքին,  համավարակի, Արցախեան ազատամարտի եւ այլ ծրագրերի համար միայն թեմի եւ ծուխերի, առանձին հոգեւորականների ջանքերով հանգանակուել է բազմամիլիոն աջակցութիւն, որոնք այսօր էլ շարունակւում են։ Արեւմտեան թեմ՝ անցնող տարում նախաձեռնած բազմաթիւ բարեգործական ծրագրերն ու հանգանակութիւններն ներկայացրեց Ծրագրերի պատասխանատու Տիրան Աւագեանը։ Դրանք առնչւում են Ս. Էջմիածնի Մայր Տաճարի վերանորոգութեանը, Բեյրութահայերին, համավարակին, Արցախեան պատերազմին (միայն վերջինի համար՝ աւելի քան 3,2 միլիոն դոլար), յատկապէս շեշտելի համարեց Առաջնորդ Սրբազանի ու հոգեւոր հովիւների անձնական մասնակցութիւնը այդ ծրագրերին։ Ծրագրերը շարունակական ընթացքի մէջ են, ինչպէս օրինակ՝ աջակցութիւնը Արցախից տեղահանուած ընտանիքների սոցիալական ապահովութեանը։ Մարդասիրական ծրագրերի մէջ են նաեւ հիւանդանոցներին աջակցութիւնը՝ թէ՛ Կալիֆորնիայում, թէ՛ Հայաստանում։

Կանոնական հարցեր։ Հոգեւորականաց ժողովի ժամանակ արծարծուեցին ծիսական-կանոնական այժմէական մի շարք հարցեր։ Կանոնական հարցերի շուրջ բանաձեւեր մշակելու համար ստեղծուեց յանձնախումբ Յովնան Արք. ղեկավարութեամբ եւ Հայր Տաճատի, Տէր Շնորհք Քահանայի, Գեւորգ Սարկաւագի մասնակցութեամբ։ Սասուն Ծ. Վարդ.ը առաջարկեց աւարտին հասցնել Ծիսական արարողութիւնների տպագրութեան շարքը, որից ցարդ տպուել են 11 հատորեակներ։

Առաջարկուեց ստեղծել քահանայական թեկնածուների ուղեցոյց՝ մարզելու համար նոր թեկնածուներին ու ծխական մարմինների անդամներին, որոնք յաճախ տեղեակ չեն կանոնադրական դրոյթներից։ Վերջին այս նպատակի համար Առաջնորդ Սրբազանի յանձնարարութեամբ ստեղծուեց յանձնախումբ։ Յովնան Սրբազանն այս առումով ներկայացրեց նաեւ թեմական խորհուրդին կից կանոնադրական փոփոխութիւնների ընթացքը։

Ապագային միտուած առաջարկութիւններ։ Հոգեւորականաց ընդհանուր ժողովի գործնական բնոյթի եւ արդիւնաւէտ քննարկումների մասին են խօսում արուած բազմաթիւ առաջարկները, որոնց մի մասը վերը թուարկեցինք։ Յառաջիկային պատեհ առիթով պիտի անդրադառնանք Առաջնորդ Սրբազանի կողմից առաջադրուած մի շարք թելադրութիւններին։

Ժողովի ժամանակ ներկաները ողջունեցին վերջին շրջանում Արեւմտեան թեմին միացած Տ. Կոմիտաս Քահանայ Զոհրաբեանին, Տ. Գեւորգ Քհնյ. Աբեանին, Գեւորգ Սրկ. Գեւորգեանին, Աւագ Սրկ. Զաքարեանին, Սեւակ Սրկ. Տէրտէրեանին։ Առաջնորդ Սրբազանը ներկայացրեց նաեւ Ս. Ղեւոնդեանց Մայր տաճարի խմբավար Րաֆֆի Միքայէլեանին։

Մի շարք հարցեր գործնականօրէն լուծելու համար ներառնուեցին Վարչական ժողովի օրակարգի մէջ։ Իսկ գործարկուած յանձնախմբերը պիտի յառաջիկային ներկայացնեն իրենց աշխատանքի արդիւնքները։

Արեւմտեան թեմի Հոգեւորականաց ընդհանուր ժողովն իր աշխատանքը աւարտեց Առաջնորդ Սրբազանի ամփոփիչ խօսքով, ապա շարականի երգեցողութեամբ ու աղօթքով։

Դիւան Առաջնորդարանի

5 Մայիսի, 2021

Place for supporters
& advertisement