Նվիրապետական Աթոռներ

Պատրիարքական Ընդհանուր Փոխանորդի քննական այցելութիւնը Տիյարպաքըր

Պատրիարքական Ընդհանուր Փոխանորդ Բարձր. Տ. Արամ Ս. Արքեպս. Աթէշեան Հինգշաբթի գիշերային թռիչքով, իր թիկնապահին ընկերակցութեամբ մեկնեցաւ Տիյարպաքըր։ Ծանօթ է, թէ վերջին ամիսներուն քաղաքի ներպարսպեան շրջանին մէջ պատահած տխուր դէպքերոու հետեւանքով վնաս կրած էին բազում կառոյցներ։ Պատմական Սուրբ Կիրակոս Եկեղեցին եւս կը գտնուէր այս շրջանին մէջ։

Նկատելով, որ շրջանը արգիլեալ գօտի էր, Սրբազան Հայրը նախ քան իր մեկնումը շփումներ ունեցաւ թէ Տիյարպաքըրի Կուսակալութեան եւ թէ քաղաքի Ապահովութեան Ընդհանուր Տնօրէնութեան հետ։ Ուստի Սրբազան Հօր քննական այցելութիւնը իրականացաւ Ապահովութեան Տնօրէնութեան տրամադրած հինգ պաշտօնեաներու ընկերակցութեամբ։

13323590_585884048238149_4536806044230466587_oԵկեղեցւոյ գովնտի փողոցը եւ անոր դրացի շրջակայ բնակարանները ահաբեկչական արարքներու եւ ահաբեկիչներ հետապնդելու համար կատարուած գործողութեանց հետեւանքով ծանր վնաս կրած էին եւ բնակարաններ՝ անբնակելի դարձած։ Այս առումով եկեղեցւոյ արտաքին շրջաբակը փողոցէն զատող պատը եւս վնասուած ըլլալով, եկեղեցւոյ պարտէզը փողոցին միացած էր։

Եկեղեցւոյ եւ դրացի Քաղդէացի Կաթոլիկներու եկեղեցւոյ միջեւ գտնուած միջնորմը ծակուած էր, մեծ հաւանականութեամբ փախուստ տալու համար։

Եկեղեցւոյ պատերը եւ զանգակատունը, տանիքը մնացած էին անվնաս։ Սակայն եկեղեցւոյ ներքնամասը անմխիթար վիճակի մէջ կը գտնուէր։ Յայտնի էր, թէ եկեղեցին օգտագործուած էր որպէս ապաստանարան, քանի որ ապակիները եւ դուռները կոտրուած էին, ատեանին եւ վերնատան մէջ կը գտնուէին անկողիններ եւ ուտելիքներ, նաեւ ջեռուցման համար զետեղուած էր վառարան։ Նորին Սրբազնութիւնը, յոյս յայտնեց, որ մօտ ապագային ներպարսպեան շրջանի մէջ ձեռնարկելի վերաշինութեան եւ բարեզարդման աշխատանքները իրենց անդրադարձը պիտի ունենան նաեւ շրջանի կրօնական կառոյցներուն եւ անոնց շրջապատներուն վրայ եւս։ Երբեմնի Հայ Կաթողիկէից եկեղեցիէն, որ ընկերային օժանդակութեան հիմնարկի մը կողմէ կ՚օգտագործուէր բարեսիրռական նպատակաւ, այժմ կանգուն պատ չէր մնացած։ Պատմական Քուրշունլու Մզկիթը հրկիզուած էր։ Այս բոլորին 13308401_585884044904816_8210700537369313350_oառընթեր, մխիթարական էր գոնէ ականատեսը ըլլալ թէ, եկեղեցւոյ կառոյցը անվնաս եւ անվթար մնացած էր։

Սուրբ Կիրակոս Եկեղեցին, Բարձր. Արամ Սրբազան Հօր ջանքերով եւ բարերար մերազնէից նուիրատուութիւններով, վերջերս վերանորոգուած ըլլալով ներկայանալի վիճակ մը կը պարզէր։ Այժմու անմխիթար վիճակը կարելի է բառնալ ներքին բարեզարդութեամբ եւ վնասուած իրերը նորերով փոխանակելով։ Նորին Սրբազնութիւնը աղօթեց, որ խաղաղութիւնը վերահաստատուի այս պատմական քաղաքին մէջ, որուն կապուած էր համաքաղաքացիական կապով՝ իր ծննդեամբ եւ միաժամանակ Ս. Կիրակոս Եկեղեցւոյ՝ իր մկրտութեամբ։

Սրբազան Հայրը Ուրբաթ գիշեր վերադարձաւ Ստանպուլ։

Place for supporters
& advertisement